大記者埋怨香港缺乏場地做公共展覽，旅發局為唔夠MICE場地舉辦大型國際旅遊、展覽活動極傷腦筋，好多學校、社團、富翁為咗爭取擺酒一百圍，感到頭痛。既然咁多需求，灣仔會展直情係皇帝女，唔憂嫁，在商言商，賺錢第一。去亞洲博覽館咩，唔係唔得，好多國際巨星咪喺博覽館演唱囉，但搞結婚壽宴、學校慶祝50年、100年，或書畫展覽而去到機場，簡直係同人客開玩笑啫。
香港以管理嘅學術語講，capacity utilisation已經高於100%以上，樣樣扯到直一直，再無空間。點解唔擴充，所謂「擴容」？哎，冇地囉，有地就話要起樓起公屋，連醫院、展覽場地、甲級寫字樓，都搵唔到足夠大型地皮興建。故此大記者一想起搞不大不細嘅書法展覽都要周圍撲場地（去年撲唔到），就話渴求西九龍文化區早日建成，唔好荒廢地皮日日曬太陽。
西九龍他日是否有足夠展覽場地滿足香港文化藝術演藝界需求，依家唔清楚，但有咗就一定好過冇。西九遲遲未動工，當然係因為「推倒重來」，夜長夢多之故，假使曾蔭權當政務司司長時期，政府已經可以拍板讓私人財團興建，今日已經落成，為各界服務啦。呢呢，改為政府項目，就有更多政治干擾，一拖再拖之下，原來預算已大大落後，追唔上建築費狂升，點收科？問吓好打得嘅林鄭月娥啦，佢話2017任滿後，堅決退休，不問政事，算佢幾聰明，自任政務司司長以來，林鄭跟住梁振英，有乜建樹？基本上係零，再跟多五年，都係浪費退休歲月嘅啫。
香港唔夠場地辦大型展覽，新加坡就有過多場地喎。聽業界人士講，香港近年辦Art Basel、Watches & Wonders，極為成功，聞名世界，令新加坡眼紅，要搶香港一杯羹，一於以本傷人，向Watches & Wonders參展商提出極優厚條件，並促使當地賭場贊助經費。賭場大客與用一、二百萬元買一隻手錶嘅豪客，基本上同屬一類人，賭場贊助喎，求之不得，直情由附屬酒店送埋免費房間㖭！香港鐘錶界人士同左丁山講，正常情況下，香港根本不可能「奉獻」相同條件。此乃自由經濟與操控經濟之分別。梁振英正朝向操控經濟，大政府，小市場方向前進，希望行新加坡嗰一套，香港經濟學界應就此展開一場大辯論。