香港早幾日寒流來襲，掀起一陣上山「追冰」潮，不過噚日溫度升番唔少，已見雙位數，但新民黨主席葉劉淑儀出席立法會會議時，都出動到皮草大褸。嘩，唔驚啲動物權益組織狙擊咩？葉劉話喎，來自養殖嘅mink，其實「同食牛肉一樣」。咁講即係冇有怕咁噃！
稱意大利設計廣州製造
查實葉劉呢身闊太打扮，噚日都幾搶眼，路過嘅獨立議員黃毓民見到，都忍唔住問佢：「你嘅皮草真定假？」葉劉自己解謎話係堅，原來身上呢件係國貨，係佢十幾年前仲做緊保安局局長時，喺哈爾濱睇冰雕時買㗎。雖則喺大陸買，但葉劉強調件褸係意大利設計、廣州製造，形容係國際貿易嘅示範嚟嘅，仲透露當時一擲萬幾蚊人仔買㗎！
查實保護動物權益嘅組織已經一再指出，將野生動物圈養取毛係唔人道，為咗唔損害皮毛嘅完整，剝皮嘅方式都非常殘忍，但葉劉就覺得，皮草嚟自養殖嘅farmed animals、其實同食牛肉差唔多喎！
八方問過自由黨紡織及製衣界議員鍾國斌，佢就話𠵱家大部份皮草都係農場養，而過往皮草需求最大嘅地方係俄羅斯，但近年當地經濟差咗，中國需求反而大咗。至於香港咁嘅天氣使唔使着皮草呀？佢話喎，始終有啲闊太鍾意嘅！
李八方
mailto:[email protected]