強國人真係有好多奮鬥成功嘅例子，好似今日掛牌嘅湖北公司中國融眾金融（3963），55歲嘅創辦人謝小青，經歷十分豐富。招股書提到，佢大學讀中醫，1995年至2001年走咗去武漢市凱悅工藝玩具廠擔任廠長，2001年就以「本身的財務資源」創辦融眾公司，從事提供個人貸款嘅貸款擔保服務，生意由武漢擴充到廣州、重慶、長沙同成都，𠵱家仲上埋市㖭。
人哋做玩具廠廠長，都可以做到有豐富「水源」去開貸款擔保公司，兼且做埋上市公司主席，香港廢青們見到呢個case，係咪要認真檢討吓！
中國融眾金融上市集資大約2億元，除咗普通貸款服務，舊年亦成立咗航空部，發掘有關飛機、飛機摩打同其他設備嘅租賃機會，似乎有意同中國飛機租賃（1848）、中銀飛機租賃競爭。