效力巴黎聖日耳門嘅34歲瑞典國腳前鋒伊巴謙莫域，日前同經已退役嘅法國欖球傳奇球星查波（Sebastian Chabal）出席法國唱作人Jean Louis Aubert嘅慈善音樂會，仲齊齊上台進行咗一場慈善拳賽，最後由伊巴贏咗，查波仲要求重賽㖭。伊巴同查波開玩笑咁講：「傳奇，我先係法國唯一嘅野獸……」當然，伊巴同查波喺台上梗係唔係嚟真，佢哋兩個只係扮嘢作狀打；如果真打，我求大俠深信外號「野獸」、體重達113公斤嘅查波應該會打贏伊巴囉。