呢排政界中人見面聚首，都互相問見過乜乜物物未，當然要多謝創科局局長楊偉雄帶起潮流。恒隆主席陳啟宗噚日都分享見過名人嘅趣聞，包括上星期見到俄羅斯副總理德沃爾科維奇（Arkady Dvorkovich），以及之前見過俄羅斯總統普京嘅點滴，強調同普京係有「交流」㖭呀，真係可以自豪講句︰「我見過，我真係見過！」
批下屆特首 鬍鬚曾冇機
陳啟宗噚日以明天更好基金信託人身份同傳媒茶敍，大家最想知嘅梗係佢仲挺唔挺特首梁振英，佢呼之欲出話「畫公仔唔使畫到出腸喇」；至於其他疑似候選人，當然唔挺，例如佢指財爺曾俊華「絕對冇（機會）」、前財爺梁錦松就「再睇啦」。至於會否再有商界中人落場，佢話「唔（冇）乜可能」喎！
講講吓，佢重提1998年金融風暴嗰陣，多得好有guts嘅前特首董建華，夠膽用港元同大鱷對打，咁先保得住港幣，跟住又大讚當年政府有好好嘅管治人才。唔少記者追問佢點睇現屆政府呢，佢即刻轉身射個三分波，話現屆政府班子個個都好，絕對冇問題！哦，被指成日外遊嘅教育局局長吳克儉，原來喺佢心目中都係良才！
吹（捧）完一輪下屆特首後，陳啟宗分享上星期同訪港嘅德沃爾科維奇會面嘅趣事。原來呢位副總理係孝子，連外訪都帶埋75歲嘅媽媽出席，陳啟宗一盡地主之誼，請咗佢哋去南丫島食海鮮，同時問埋副總理究竟普京係點嘅人，副總理話，其實普京成日笑㗎喎！講講吓，佢仲話自己查實都有見過普京㗎，兩個人仲同台坐咗兩粒鐘，而且係有「交流」嗰種喎！
李八方
mailto:[email protected]