facebook上有許多「XX Secrets」的群組，外國就有名為「Whisper」的網站，用戶一樣是匿名留言，大爆各行各業不為人知的秘密，真亦假時假亦真。當中有屬於酒店業員工的版面，留言者由櫃枱接待、行李員到清潔工都有。遇上難頂的客人時，佢哋會用舊床單鋪床、又或者扮聽唔到你講嘢。別以為畀多啲錢住靚酒店就可避免，有五星酒店員工就表示，跌落地的蛋糕，如無穿無爛，就若無其事擺番上去碟，反正無人知。駭人之餘，又隱隱覺得好像似曾相識。不過正如一位網友所說，其實酒店工作人員都係人，你對佢好，佢亦會對番你好。咪以為無用，原來房間免費upgrade，都喺睇員工對你的印象分！以下節錄部分員工留言：
1.「有無覺得酒店大堂冷氣好凍？係特登嘅，因為唔想啲無謂人坐咁耐。」
2.「房入面張氈，其實一年先洗一次。」
3.「有時我懶得郁，咪將啲舊床單，摺過當洗咗咁用。」
4.「張匙卡嘟唔到？因為嗰客好乞人憎，我咪喺電腦整到佢無效。」
5. 「有客人打電話來book房，我答佢無房，其實係我懶得check。」
6.「如果check-in時個客好nice，我會畀多啲upgrade佢（免費房間升級、餐飲等等）。態度好差的，咁就編你住𨋢口嗰間房，無景睇。」
記者：甄俊宇
（圖片：蘋果圖片庫）
資料來源：Whisper