鞏俐、羅仲謙同導演鄭保瑞日前去咗杭州參加《西遊記之孫悟空三打白骨精》IMAX試映會，好多觀眾睇完之後都大讚鞏俐飾演嘅白骨精好驚艷，內心戲做得好好，佢啲戲服件件靚爆，喺現場俾咁多人讚，搞到佢不知幾開心，仲主動同現場觀眾握手、送晒飛吻！佢話喺內地做完宣傳，農曆新年會返山東老家過節。雖然𠵱家佢長居法國，但每年農曆新年，都必定會返老家同鄉里一齊過年。
城城：好鼓舞
一向以嚟鞏俐出晒名對劇本有高要求，舊年聽到話佢肯接《西》片第二集，真係有啲難以置信。老實講第一集特技同劇情都麻麻，真係俾人鬧爆，真服咗星皓仲敢拍續集。結果早兩日抱住好奇心去睇試片，終於明白部戲點解夠膽大規模喺全中國做試映，睇嚟鄭保瑞今次想一雪前恥，佢之前拍《殺破狼2》已經覺得佢進步唔少，呢次拍《西》片續集，無論劇本、美術同特效都似樣好多。
噚日導演版嘅最新預告片出咗街，睇郭富城演孫悟空都幾精靈，謙仔個藍色沙僧好搶眼。城城都好睇重部戲，雖然隻腳傷得好重，但佢都堅持幫部戲做宣傳，過埋年先入院做手術。城城話：「部戲喺內地好多地方做完試映，反應普遍都幾好，真係好鼓舞。」
撰文：馮仁昭