熱刺前鋒哈利卡尼，一直被視為轉會市場未來焦點，連西甲豪門皇家馬德里都話想收購佢，周一卡尼就現身馬德里，唔通係施丹首簽？當然冇咁快手啦，其實係因為周中冇比賽，熱刺領隊普捷天奴就拉大隊去巴塞隆拿，去佢之前踢過嘅愛斯賓奴進行集訓，22歲嘅卡尼仔就請咗幾個鐘頭假，由哥哥陪同下，坐私人飛機去馬德里拍新一輯運動品牌「一剔」嘅廣告；巴塞出名陽光與海灘，孫興民、迪利阿里等收操後就到附近海灘曬太陽，比屈喺又濕又凍嘅倫敦開心得多。