民協上周六選出新一屆領導層，區選落敗嘅莫嘉嫻（圖）接替廖成利任主席，令香港政黨女揸fit人增至8個。莫嘉嫻話女性參政有優勢，對性別、平權等議題會較敏感，呢方面民協過往確係較少關注。
民協嘅「又傾又砌」路線喺社會兩極化下似乎越行越窄，莫嘉嫻話𠵱家嘅政治環境，中央、港府根本無意同泛民傾，只一味榨乾香港核心價值，所以民協日後會「為香港砌盡」。
莫嘉嫻話區選期間見到建制派龐大資源搞選舉，好唔公平兼無力感好重，唔想下一代人對不公義習以為常，唔想6歲女長大後話李波事件好平常，所以點都要企出嚟。
民協嚟緊9月立法會選舉最多會派出4張名單，分別喺九西、九東、新西及超級區議會出戰，中委會農曆年前會討論有關事宜。新任青年民協召集人何啟明率先表達有意角逐超級議席。