就快到農曆新年，又係辦年貨嘅時候，Jenny Bakery門口又會大排長龍，內房股合景泰富（1813）品牌總監陳淑芬近日由廣州來港公幹，好奇點解咁多人排隊，話想買埋一份咁話。
雖然近年好多強國人專登來港買Jenny曲奇做手信，但係原來唔係人人都知道呢間餅店。陳淑芬主要喺廣州工作與生活，華華噚日同佢食晏，佢先至講起，近日路經尖沙嘴，見到好多遊客排隊買曲奇，搞到佢都想買番幾盒畀廣州嘅同事試吓！
首席財務官徐錦添聽見即刻搭嘴，話識得餅店隔籬錶行嘅老闆，曾經搵對方幫手先至唔使排隊買到幾盒咋。哈哈，原來一講到人龍曲奇，上市公司高層同你我他冇分別。