旅發局主席林建岳為咗促進香港旅遊，可講得係出錢出力。做主席係義工，無糧出，但工作要求多多，成日開會，兼不時要帶團（即旅遊界業者）外訪，宣傳推廣香港旅遊，坐飛機都坐到怕啦。花大量時間為旅發局工作，當然係出力，出錢呢？唔計開私人數請不同人士飲酒食飯應酬嘞，去年憑佢面子，努力加大打公眾利益牌，為旅發局籌款獲得商界贊助不同活動嘅經費高達一億元，認真辛苦咗佢。左丁山做銀行嗰陣，已經識佢，唔怕直呼其名問一聲：Peter，乜旅發局經費唔係由特區政府撥款支持嘅咩？佢話係就係嘅，不過每年撥款不足以支持所有大型活動，而且自2015年起連續三年，所有接受政府資助嘅半官方機構，都要遵守財政司司長訂下嘅理財原則：每年削減支出百分之一，譬如是但舉一個數字，2014年政府撥款十億元，2015年就減至9億9千萬元，2016再減至9億8千萬元，2017年減至9億7千萬元……換言之即係政府強迫半官方機構年年瘦身，至於用乜嘢方法，閣下自理。
既然如此，旅發局要有新橋新計劃嘅話，就要出街籌款搵贊助嘞，好彩林主席來自商界，識得好多人啫。
但搵到錢有時都冇用，岳少嘆息話香港好缺乏展覽場地，一個新計劃做得好，次年就大傷腦筋卜場，想擴充擴大面積，邀請多啲外商來港，幾乎絕無可能，訂咗一個展覽時段之後，又幾乎全無靈活性可以提前或延後，會展無可能通融！
與岳少等人吃過午飯，返到公司收到大記者電郵邀請參觀書法展，就係1月28日至31日在銅鑼灣中央圖書館地下第一至第五號展覽館舉行嘅「心畫書學會作品展」，今年係第七屆，心畫書學會於1995年成立，今年剛好踏入第21年，創辦人李毓明老師以楊雄（漢代大儒）之「言為心聲，字為心畫」為學會取名，平時在上海總會開班授徒（限會員參加），並自設畫院開班，門下弟子眾多，今次係一眾弟子作品包括廖千慧、鄺志堅、陸嘉敏、Betty Liu（朱培慶太太）等等，當然李老師有作品壓陣。點解去年第20年唔舉辦畫展呢？大記者話：「原來香港極難極難卜到場地做大型少少嘅展覽嘅，所有場地都卜滿晒，會展諗都唔駛諗，唔輪到我地，舊年就因為搵唔到地方，將20周年展延遲到現在，西九文化區唔該快啲起好啦，場地缺乏根本扼殺香港文化發展！」