臨近歲晚，各大地產商陸續舉行新春聚會介紹新一年部署，其中英皇（163）老闆楊受成噚日就帶住阿仔楊政龍（圖），父子檔出席公司新春好友聚會。仔細望望，29歲嘅楊政龍換咗新形象，正在留緊一臉鬍鬚，又換咗新眼鏡，唔通佢嫌以前太過青靚白淨，感覺young得滯，所以想留鬚望落老成啲、穩重啲？
楊政龍喺美國波士頓大學修讀商科，加入英皇都有4、5年，現職企業行政主任，近年經常現身英皇活動，有時都會向傳媒講吓佢對樓市嘅睇法，仲講得頭頭是道。不過噚日佢就畀晒面公司執行董事張炳強，全程由對方發言，佢自己就唔方便講太多，當然冇講點解換形象喇，楊受成更加係喺活動期間低調閃人。