粵語片資深演員杜平前晚在金鐘香格里拉酒店慶祝80大壽，筵開12席，邀請了圈中親朋摯友，包括移居內地多年的契仔溫兆倫亦專程返港出席，好友則有森森、斑斑、李添勝、盧海鵬、蔡和平夫婦、尹光、吳孟達、余慕蓮和吳麗珠等。
杜平受訪時說：「由於場地問題只係擺咗11至12圍左右，好多漏咗，專程返香港搞生日會，自己喺墨爾本生活。不過親友話我咁多朋友喺香港，不如返香港見吓人，今次會留兩至三個星期左右，之後就返澳洲過年。」杜平見到一眾老友非常高興說：「有啲好耐冇見，今次返嚟都約咗佢哋食飯，好似修哥、羅蘭、家燕，見佢哋好開心，仲有達哥，都延遲返上海留低出席，仲有契仔溫兆倫專程由北京返嚟。」
只受內地傳媒採訪
杜平表示契仔溫兆倫送神秘禮物，而溫兆倫未知是否離港多時，不太接受香港的媒體，拍照後便逐一查問記者所屬報館，並說：「哦，咁我只可以同大家講聲，大家好。」然後走到電視台和掛滿內地咪牌的傳媒前接受訪問。
大病痊癒的吳孟達，今年要好好陪伴家人度歲，他說：「自己個灶要收起，準備休息，咁多年新年都唔喺香港過，今年會去大馬過，個女20歲，過澳洲讀大學，可能陪佢去。今日係老友叫到，同阿媽食完團年飯就會離港。」達哥指杜平懂得養生，要向他好好學習，他說：「佢每日都行兩至三個鐘，百病不侵。」
採訪：卓寶花
攝影：陳慧安
