曼聯新聞日日有，輸波之後特別多，內容仲特別爆㖭！神通廣大嘅英國傳媒披露，曼聯領隊雲高爾喺上周六輸畀修咸頓之後，主動向球會請辭，但就被挽留；曼聯執行副主席活華特希望佢可以教到季尾。
停操兩日周二復課
英國傳媒話曼聯上周六聯賽主場以0:1不敵修咸頓後，雲高爾即日向活華特請辭。據英國《太陽報》所講，活華特唔想曼聯季中換帥，希望雲高爾可以頂硬上，教到季尾再講；至於《衞報》就話，活華特想雲高爾返荷蘭同屋企人傾吓先，再三思辭職嘅決定。不過，《路透社》引述曼聯內部消息人士，否認雲高爾曾主動請辭。喺禮拜日，佢哋兩個再有見面，但傾得唔長，因為雲高爾已經同球會拎咗兩日假，下晝趕飛機返荷蘭，同個女慶祝生日。
日前有報道話，雲帥只係取消咗周日操練，禮拜一嗰課就由助教傑斯主持，但據最新嘅消息，雲高爾連星期一嘅操練都取消埋，等班球員連放兩日假。如無意外，雲高爾禮拜二放完假返工就會親自帶操，準備禮拜五對打比郡場英足盃比賽；操練後，佢就會同活華特再深入傾吓自己同曼聯嘅前途，另外都會講吓曼聯家陣嘅戰術同風格。
摩連奴傑斯虎視眈眈
《每日郵報》似乎有臥底喺活華特身邊，報道話活華特會繼續落嘴頭，表明球會力撐雲高爾教落去。至於《太陽報》就好似係雲高爾肚入面條蟲，話雲帥同活華特肝膽相照，雲帥主動請辭，係見到球迷不滿情緒升溫，唔想活華特難做；但活華特挽留的話，佢會繼續做落去，直至活華特決定炒佢，以報答對方嘅知遇之恩咁話。
活華特喺前年請雲高爾返嚟，加埋畀咗2.5億鎊（約28億港元）佢買人；活華特對雲高爾好有信心，而雲高爾亦對活華特好忠心。不過，活華特一直有同摩連奴經理人文迪斯聯絡。如果雲高爾堅決唔撈，曼聯請到摩連奴接手嘅機會好大。除咗摩佬外，助教傑斯亦等緊上位，可以帶住隊波到季尾。
另外，曼聯派咗球探去睇葡超，估計考察緊波圖後衞馬田斯恩迪同中場魯賓尼維斯。曼聯最近後防傷兵一大籮，而恩迪喺前年跟過雲高爾踢世盃，而且佢除咗識踢中堅外，仲可以踢左閘，可以緩解曼聯嘅燃眉之急。