創新及科技局局長楊偉雄呢排因為自稱見過Steve Jobs而成為紅人，查實佢入咗政府後，都算勤力出席業界活動。唔知係咪同姓三分親？有IT界中人話留意到，楊偉雄出動之時，身邊常有政府資訊科技總監楊德斌及香港軟件行業協會會長楊全盛陪伴在側，唔少業界私下笑稱創科界家陣踏入三「楊」啟泰時代。
又係喎，鐵三角陣容不時上陣，例如去年「香港創新及科技界領袖訪京團」舉行記者會，時任創科顧問、擔任榮譽團長嘅楊偉雄，就同其餘二楊一齊現身。噚日香港智慧城市聯盟同奧地利Austrian Technology Corporation簽訂合作意向書（圖），除咗身為聯盟召集人嘅楊全盛出席，楊偉雄同楊德斌亦係嘉賓，IT鐵三角，未來又有乜搞作？