當郵政署都要去殖化，要遮舊郵筒英國皇室徽號，皇仁舊生會卻好大膽，宣佈今年開放日期間，首次公開限量發售復刻皇冠校章噃（圖）！舊生會話喎，回歸以後，唔少校友一直希望重製皇冠校章，過去舊生會只係生產極少量作為紀念品，呢次重製復刻版兼首次公開發售，旨在畀更多想收藏皇仁舊物嘅校友留念，重溫皇仁書院回歸前嘅集體回憶。
原來舊生會對復刻校章嘅品質要求好嚴格，針線製作皆喺斯里蘭卡用人手包辦。皇冠用金線繡成，仲有精美禮盒，送禮自用都得體。校章每枚200元，喺周五、六開放日嘅攤位有售。而今年新製嘅All thy Collegians連帽衞衣、布袋同皇仁馬拉松隊隊衣，當日同樣有售。詳情可參閱 http://www.qcoba.hk 。