噚日內地A股突然又股災，雖然一日半日大跌，未影響小弟中線睇法，亦偏向相信係嚇鬼居多，但穩陣起見，先要定個策略等自己易轉身啲。投資者最近買入中資股嘅話，可考慮喺H股指數明顯跌穿7823點嘅今年低位之後，減持一半至三分之二持貨避險，並先減弱股，以免可能嘅新跌勢出現而令倉位損傷。
最近比較多人睇淡港股，但如果睇好港股嘅話，想低位撈貨，本地薑定中資股好啲？好難一概而論，小弟偏向睇好中資股多啲，而中資股就肯定係同A股齊上齊落。至於本地薑，就要逐個sector逐隻股分析，例如之前講過國際家居零售（1373）可以慢慢吸、唔使急，而本地地產股就建議唔好買了。你睇長地（1113）連日破底，走勢仲衰過弱勢中資。
誠哥畀官媒圍剿嘅一幕，大家記憶猶新。其實誠哥暗示有錢賺就得，政治佢懶得理，但佢比較親江派嘅背景，令佢變成中共嘅次級敵人。事實證明，懶理政治、甚至親共都唔夠，因為點親都親唔過親生仔，即使你為咗錢肯做契仔，他朝一樣搵個親生仔取締你。君不見公屋工程同管理，近年主要由中海外（688）包辦？沽出本地地產股嘅大戶，唔敢講係咪本着呢個思維而沽貨，但股價對每股NAV如何折讓，都冇起色，呢個係事實。買股票，不能討厭政治吧。
晉佳
https://www.facebook.com/advanceguy1/