新股好孩子中國（6186）想挑戰港股寒冬，揀正呢個時候嚟上市，似乎拍得住霸王女硬闖大帽山。不過，公司可能知道香港呢幾日真係好凍，噚日舉行投資者推介會，送上羊毛圍巾畀投資者做紀念品。圍巾睇落唔錯，摸上手幾滑，仲可以即時拆出嚟用㖭。
公司講明，今次在港上市主要為集資開分店，主席宋鄭還與行政總裁富晶秋應該想畀投資者睇吓佢哋喺內地嘅零售店大致係點樣，喺酒店舉行投資推介會，都幾乎set咗個舖出嚟，順便展示旗下BB車、BB床同衫仔等等產品，加個售貨員就可以做埋生意㖭呀。
中國實施「二孩政策」，嬰兒用品市場可能真係有得做，不過都係嗰句喇，𠵱家港股市況咁差，要投資者肯落飛買新股可能難過湊仔。