雖然香港天氣與地產市道一齊步入寒冬，但無阻中原地產照舊喺灣仔會展筵開220席舉行周年晚會，同3,000名員工玩番晚，包括中原亞太區住宅部總裁陳永傑、中原亞太區總裁黃偉雄、中原中國部主席黎明楷、港島區執行董事唐秉正等。佢哋仲搵來幾位舞蹈員跳舞暖場，不過見到佢哋嘅衣着就覺得凍嘞。
佢哋今年嘅晚會主題係「We are the boss」，意思係叫手足們掌握自己命運，把握機遇，即係盡力開單搵生意咁喇。
中原兩位創辦人施永青與王文彥當然有到場，市場一直盛傳兩位以前有心病，近年friend番，不過呢晚多數各有各同嘉賓吹水。主席施永青就話，嚟緊會同王文彥開會，研究一下中原上市事宜。
呢晚各間發展商都有代表畀面到，由長實地產（1113）、新地（016）等巨無霸去到中小型發展商，基本上講得出嘅發展商都有代表在場，施老闆認真大面子。