會計N在美國提早退休嘆世界，中學死黨發咗達，開公司，聞訊立即捉佢回港做兼職幫手睇住及推行公司重組。呢日在電車路碰到，一路行一路傾，行到恒生銀行，會計N有感而發：「我聽到你地特首猛講一帶一路商機，我啲美國朋友亦來電郵問我在香港聽到有甚麼機會。我大體就唔識嘞，只係知道我係美國人，想到銀行開番個戶口，實在艱難，一帶一路國家嘅公司來港開戶口，係唔係一樣咁難呢？如果係，點做生意？」美國人因有FATCA問題，與人無尤，係不受本地銀行歡迎嘅，但一帶一路國家嘅公司與個人，來港開戶口又會點？
經會計N一提，是晚與一班賓架參加飯局之時，乘機發問，點知一問就篤正要害。賓架L平時長駐上海，係銀行中國區高層，佢首先答：「烏茲別克，哈薩斯坦等等中亞一帶國家，從來未同我地往來過，金管局對KYC （Know Your Customer）管得極嚴，我在上海識咗一兩個一帶國家嘅朋友，介紹佢地嚟我地銀行香港總行開戶口，經過三個星期，合規部仍然話未得，朋友鬼殺咁嘈。一路國家（東南亞至印度中東）我地比較熟悉，開戶口有問題，但問題不大，但同『一帶』國家開戶口做生意喎，梁先生應該問過曾財爺與陳總裁先。」
唔通有生意唔做咩，要合晒所有規矩、規格、規條先至得㗎，金管局睇到實晒之下，一帶國家之公司及商人來港開戶口都未必掂，冇戶口就難做生意，在座賓架一致睇淡。一位更記得當年曾特首與小甜甜率領大隊商界高層去大西北視察，投北京所好，結果返嚟之後人人縮沙，小甜甜都未投資過。今天「一帶」，即當年開發大西北之延伸，香港商界精過鬼，邊有人肯願意「行先死先」吖。一位賓架話佢與國企好熟，知道國企對「一帶」仲係按兵未動，唔敢投放資金於甚麼克，甚麼斯坦堡。香港商人誓死不會為天下先，梁先生在施政報告大講「一帶一路」，純係講「學術」箒，大財團暫時冇興趣，中小企冇資格、冇資金去「一帶」搞生意，至於一路頭段（東南亞國家）老早係福建幫、潮州幫商人勢力範圍，廣東幫都打唔入，去遠啲，就係本港印巴裔商人嘅「主場」，香港幫唔敢去嘅。「一帶一路」商機，講到尾係國企打前鋒嘅世界，香港可以過水濕腳嘅啫！