【真．寒流】便利店熱飲 即買即飲暖笠笠
做記者，成日出街搵料是常識吧，但今個星期喺「終於有冬天」嘅香港行嚟行去，就算着HEATTECH都未必頂得住，唯有時不時就買返支熱飲暖吓個body喇！各大小便利店每逢冬天，都會放返個熱飲櫃出嚟，其實入面除咗有港產奶及咖啡外，仲有唔少日本直送嘅得意飲品，話唔定會有驚喜大發現！
（左起）SUNTORY玉米濃湯 $11.9、POKKA洋葱湯 $7。熱粟米湯喺日本好常見，洋葱湯就少有啲，最緊要買完趁熱飲，凍咗味道較差。
UCC牛奶抹茶，抹茶Latte絕對係港女最愛。$9.9
（左起）新加利梅子蜂蜜 $10.9、韓國杯裝蜜糖柚子茶 $8.9。冬天飲杯蜜糖水，保暖又滋潤，仲有杯裝柚子茶，用熱水沖完即飲，非常方便。
Asahi焦糖蘋果茶，嫌熱茶悶，不妨試試微甜嘅焦糖蘋果口味，非常開胃。$12.9
記者︰黃依情