林雪雖然喺「毛記分獎禮」分唔到獎，不過就得到廣告客戶垂青，搵咗佢同陳惠敏以及毛記主播Dickson一齊合作拍咗個龍江雞廣告。過往演慣社團大佬手下嘅林雪，今次竟然騎番住陳惠敏做老大，認真巴閉。
左青龍右滑鼠
呢個廣告噚晚喺網上播出，劇情講佢兩個喺社團上香拜神嗰陣唔見咗隻雞，原來係林雪靜雞雞偷食咗。另外，林雪同陳惠敏透過facebook收𡃁，化名「滑鼠」嘅Dickson去「見工」，佢仲紋咗左青龍右滑鼠喺兩隻手度，論論盡盡嘅佢仲唔小心仆親，一手㩒低林雪。
林雪帶住個假髮拍足一日，加上現場經常放煙，熱到佢成身汗，事後林雪話：「同惠敏哥拍都好驚訝，佢叫我大佬，有啲唔敢當。至於個小朋友（Dickson），佢有用心，反應畀得好準，我唔知佢係邊個，但佢係得嘅。」至於Dickson就話：「要喺片中㩒住雪哥個頭，又唔識就力，唔小心真係打咗下雪哥，但反而佢向大家講係佢自己唔小心整親，唔關我事。」
撰文：馮仁昭