如果要揀大家認為最唔掂嘅梁班子官員，花生友都幾有信心，鍾意遊日睇紅葉嘅教育局局長吳克儉，肯定會「名列前茅」！有政界中人同花生友講，教育政策對管治班子非常重要，皆因中產專業最關心嘅就係下一代嘅教育，如果個領導班子搞教育無方，唔使旨意攞支持喎。咦，唔通CY都睇得出，唔搞好教育就難獲中產歡心，所以日前透露，未來一年重點搞教育？
被睇死有吳得掂必徒勞
梁振英日前喺一個論壇上話喎，政改結束之後，政府花咗相當多時間進行教育工作，未來亦會重點推動，包括班級與教師嘅比例問題等。有政界中人聽到CY此言就衰衰咁話喎，唔係話唔畀CY打教育牌，但大家一諗起個局長嘅「質素」，相信未推任何嘢前已經扣晒分，覺得CY只會徒勞無功。另有厚多士更形容吳得掂係「火水局長」，認為關於教育局，多一事不如少一事，皆因若然畀局長掂親，隨時出事，CY果然藝高人膽大！
有人就覺得，蓄勢競逐連任嘅CY，明顯都要藉教育政策爭番少少中產專業階層支持啩，與此同時，被認定係特首黑馬嘅前財爺梁錦松頻頻出動講教育喎，姑勿論阿松嘅教育鴻圖大計市民係咪受落，但至少都來勢洶洶，如果CY唔喺教育上發憤力追，肯肯定被比下去，唔知呢個會唔會都係CY強攻教育嘅原因呢？
花生友
周二、四刊出