新任亞錦賽公路單車「雙料冠軍」張敬樂，獲港隊總教練沈金康放行，今日可以出戰男子場地記分賽，爭取亞錦賽第三金！
喺公路賽贏得兩金兩銀一銅嘅港隊，噚日到咗伊豆修善寺日本場地單車中心，備戰今日展開嘅場地賽。沈教練講過呢個2020東京奧運場館室內冇暖氣，當地攝氏二至四度嘅低溫可能影響發揮；但阿樂踩場後第一個感覺係場內好溫暖，即時冇晒顧慮。佢同梁峻榮今日會拍住上角逐男子記分賽；而同日舉行嘅男、女子團體追逐賽，港隊就分別派出阿樂大佬張敬煒同楊倩玉等出戰。除咗力爭第三金，阿樂更加想減磅，目前74公斤嘅佢期望減四公斤：「希望以更大運動量，配合均衡飲食減磅，但唔會強求，減到就減。」