每逢新年前都會拍片同港人賀年嘅英國駐港總領事吳若蘭，近期好少喺公開活動出現；送羊迎猴前，佢終於露一露面！
噚日中午，若蘭BB去咗政務司司長林鄭月娥嘅官邸午宴，其實英國國會跨黨派中國事務小組成員代表團正在訪港；林鄭就代表特區政府設宴洗塵，若蘭BB當然都係座上客（圖）。
據知林鄭席間向代表團講述香港最新發展同一國兩制落實情況，同時討論咗港、英喺經濟、貿易同文化上嘅聯繫。政府話呀，呢次嘅近十人代表團，係12年前首度訪港後、最多成員到訪嘅一次，代表團訪港一星期間會同多名政府高官同立法會議員會面，亦會參觀不同機構。