香港總商會最近花咗1,000萬，將位於統一中心嘅總部擴充兼且翻新，1.7萬呎地方除有多個會議室供會員、公司租用，最矚目當然係整咗一幅年代跨越155年嘅歷史牆。
上得牆梗係要人要事，首幅相片就係1861年創會時總商會首個開會地點香港會。主席彭耀佳睇住昔日英倫風格嘅香港會，大嘆香港保育做得唔夠好，令歷史建築未能保存至今。
歷史牆仲介紹總商會首位立法局代表、時任匯豐銀行總經理昃臣，當然唔少得2011年由政府過檔嘅首位女性行政總裁袁莎妮。早前袁莎妮被影到同港視主席王維基一起現身銅鑼灣大坑，問到介唔介意被影，佢話香港係自由社會喎。