踢波有格食格，好似利物浦咁，今季英超俾跌晒watt嘅曼聯雙殺。至於阿仙奴俾邊隊剋死？咪係一樣頹到爆嘅車路士囉。前日佢哋喺隊長梅迪薩卡見紅下主場輸俾車仔0:1，今季俾車仔雙殺，𠵱家跌落第三，爭標之路受到重擊；領隊雲格仲輸波賴地硬，死撐話迪亞高哥斯達（DC）出陰招搞死梅迪薩卡。
梅迪薩卡鏟DC領紅
阿仙奴首循環作客車仔，有基比爾包列斯達同辛迪卡索拉被逐，最終慘輸0:2。前日佢哋挾三哥之名兼有助攻王奧斯爾傷癒，喺主場鬥賽前排14嘅車仔，大家都以為佢哋可以報番一箭之仇，點知結果一樣，又係有人領紅兼全失三分。梅迪薩卡喺19分鐘，就因為從後鏟跌單刀嘅DC而直接領紅出場，雲格即刻變陣，以包列斯達入替喺賽前10場入九球嘅基奧特，諗住守到尾，但好明顯做咗錯誤決定，事關包列斯達喺幾分鐘後即走甩DC，俾後者接應伊雲洛域右路底線傳中射入。
雲格去到57分鐘焗變，先後換入阿歷斯山齊士同阿歷士張伯倫，希望用速度拉散車仔防線，但最終都係輸0:1，今季聯賽俾車仔雙殺，家陣喺聯賽榜同曼城都係23戰得44分，但因得失球較差排第三，兼比榜首嘅李斯特城少三分，仲以2.6倍變番冠軍次熱，大熱係1.98倍嘅曼城。車仔就以23戰28分升上第13位。
換「銀河唯一」自廢武功
雲格似乎輸得唔服，賽後狂插DC：「我唔知DC係咪越位，亦唔知梅迪薩卡有冇掂到佢，淨係知佢今季搞到我哋有兩個球員出場，呢個係事實，我冇屈佢。搞到對方被罰出場係前鋒其中一項工作，佢絕對係專家。」車仔領隊軒迪克就話：「DC當時單刀，但就被鏟跌，唔使講，一定係紅牌。」
我求大俠知DC個底好花，但雲格又好似冇乜point喎，唯一解釋係DC專登放慢速度俾梅迪薩卡鏟囉。至於點解換走基奧特，雲格話「銀河唯一」因有少少傷喺上周六冇練習，驚佢體力應付唔到10個打11個，但佢換走前線最「弗」嗰個，猶如自廢武功，輸波真係有少少係自己攞嚟。
