猴年賀歲盃一度面臨「難產」，結果喺足總最後關頭接手下總算保得住，各位球迷喺農曆新年可以繼續「年照拜、波照睇」，仲一張票，睇到笑，睇齊三料娛樂㖭！
今屆賀歲盃雖然冇外隊，亦由傳統嘅大年初一喺大球場踢，改做大年初二喺旺角場踢，但就有三料娛樂。先有女子足球，緊接就名宿上場，然後先到重頭戲港隊對港聯（見附表）。一次過睇三場完全唔同嘅賽事，都只係100蚊，抵到爛！門票今朝10點就會喺Cityline開售，有買趁早！
「經典外援」Kim sir都落場
各隊大軍名單仲未落實，但經典隊嘅初步名單星光熠熠，港隊有譚兆偉、招重文同山度士三位近代中場指揮官壓陣，仲有「左倫右李」歐偉倫同李健和，郭家明同黃文偉就做教練；外援隊方面，盧比度、狄恩同迪天奴等名將都榜上有名，踢過港隊嘅「大俠」羅倫士同高尼路都有份，當然唔少得港足主帥金判坤！雖然今屆搞得有啲急，但足總都可以搞到三料娛樂，賽事咁多元化；其中女足喺上年開始關注度大增，女子省港盃都坐滿九龍灣公園㗎！
梁孔德：我諗會爆棚
對於部份球會唔派兵，足總主席梁孔德話未驚過：「港隊唔係得11個，𠵱家個個都爭住踢香港代表隊。」對於票價100蚊，梁主席話其實想賣貴啲，幫補吓之前啲罰款，但為咗多啲人入場，都係唔賣咁貴。佢仲對銷情好有信心，豪言：「我諗會爆棚！」佢仲話因為多球員參與，會留番啲飛畀佢哋，加埋領隊、教練等，公開發售嘅門票大約得4,000張，仲叫球迷快啲買飛，驚賣晒喎。
噚日亦公佈咗足總盃抽籤結果，除咗九支港超聯球隊，足總盃初賽三支出線隊伍晨曦、大埔同灣仔都會參賽，下個月三號由香港飛馬同灣仔踢揭幕戰，決賽5月15號會喺大球場舉行。上屆僅得亞軍嘅東方就抽到好籤，決賽前避開晒強隊；南華同傑志就喺上線困獸鬥，仲有冠忠南區同香港飛馬亂局。