歐央行總裁德拉吉上周四話，喺下次亦即3月份議息會議上，可能有必要檢視及重新考慮歐央行嘅貨幣政策，語畢全球股市即彈。
事實證明，金融海嘯之後，環球經濟齊齊要以寬鬆幣策吊命，減息、負利率、量寬……而且隨着時間過去，劑量要越加越大先夠用，有如吸毒般上癮。所以德拉吉上周暗示會再加大寬鬆力度，環球股市即時興奮返晒。
不過大家對於德拉吉都係唔好抱太大期望，德拉吉影響力的確唔細，曾經成功喺2012年遏止歐債危機發酵，不過同美國聯儲局主席耶倫比較，推動環球經濟同支持資產市場嘅影響力都仲有啲分別。
德拉吉可以點樣拯救地球？歐央行可以再減息、再加大買債力度，可惜過去經驗證明，歐央行買債從來唔及美國手鬆，如果對歐央行買債可以釋放嘅流動性抱太大期望，最終只會失望。
歐加碼量寬恐惹動盪
更重要嘅係，同一樣嘢，如果係由美國而非歐元區做，支持作用相信會大好多。事關好多新興市場都有發行以美元計價嘅債券，甚至係將貨幣同美元掛鈎，所以如果美國唔加息住，將更能阻止新興市場走資。
倘若美國聯儲局調轉頭減息，又或者再量寬做QE4，更加可吸引資金重返新興市場再炒一輪。
筆者認為，除非美國宣佈暫停加息，否則單靠歐央行加碼量寬，環球資產市場恐怕好快又會再度陷入動盪。
本周美國議息，一旦美國聯儲局主席耶倫對加息態度冇軟化，大家要有心理準備，市況隨時會急轉直下。
El.
本欄逢周二、五刊出