施丹（小圖）上任皇家馬德里教頭後，喺禮拜日首嘗失分滋味，佢哋作客以1:1逼和貝迪斯，賓施馬追平嗰球仲有越位之嫌。皇馬呢場有加里夫巴利受傷，由占士洛迪古斯打正選；佢哋七分鐘就先失波，被對手艾華路施祖度射入。71分鐘，卻奧斯傳波入禁區，喺越位位置嘅占士洛迪古斯攞到，傳中畀賓施馬射入；旁證睇漏眼冇舉旗，入球判有效，兩隊踢成1:1完場。施丹上任頭兩場都大勝，嚟到第三場終於贏唔到。皇馬繼續排第三，落後巴塞隆拿同馬德里體育會四分。另外，基斯坦奴朗拿度（C朗）蓄意踢貝迪斯球員摩連尼路，但球證睇唔到，有內地傳媒話呢次已經係C朗自舊年十月以來第五次踢人。