現年23歲的賭王四房長子何猷亨，早前被爆曾力追陳凱琳，又體貼幫劉佩玥買外賣，最終猷亨情歸26歲的「新一代宅男女神」陳瀅。獲賭王公子公開認愛後，陳瀅即升呢做「何家嫂」，騷價急升，連在公司地位亦變得超然，成為眾人大師姐，陳瀅昨日在銅鑼灣接受本報記者專訪時笑着說：「其實感覺有少少難受，冇女仔想自己係最大嗰個嘛，但都要面對。」
陳瀅入行短短四年，至去年推出全裸寫真才嶄露頭角，但最終能成功彈起似乎仍要靠與猷亨拍拖的新聞，陳瀅直認想公私分明，她說：「其實公開唔係太長時間，有時覺得少少唔公平，點解每次都將自己嘢拉埋嚟講，希望觀眾睇到我係一個獨立個體。其實我一向將感情事都低調處理，perfer觀眾知我工作上嘅嘢，我都好勤力㗎，嚟緊繼續咁勤力！」是否被公司要求將戀情低調？她說：「唔係，係自己要求，我同狗仔Baymax可以高調啲。」
去年確實是陳瀅最豐收一年，除拍拖好開心外，接演的兩部劇集都令她被更多人認識，她說：「上年對我嚟講太大轉變，由基本上出街冇人認到，後來認到我個樣但講唔出名，覺得自己真係好幸運，知道自己真係好想做一個演員。」陳瀅最近跟隨外籍老師學唱歌，希望新一年能作多方面發展，她說：「老師話我聲線有問題，太細聲，練習多啲對做戲都有幫助。」
想再出寫真
問到陳瀅可會再推出更突破的寫真集？她說：「自己梗係想出，去年賣點係全裸，但其實唔係好性感；再有機會想做唔同類型嘅嘢，可能係電子書，或者同兩隻狗一齊影。」老闆鄒世龍亦好贊成陳瀅拍拖，他說：「佢開心，我就開心，我通常唔問佢哋私事，佢講我就聽，男女拍拖好正常。佢同我17歲個仔智商好似，除咗有時頂嘴，其他時候OK幾好。」
採訪：何慧斯
服裝：Tout a coup
