工聯會之前搞咗三場獨居長者團年宴，搵嚟政界中人做嘉賓；噚晚「安哥」加場，請嚟傷健人士食飯團年，特別請咗食衞局局長高永文做嘉賓。民望高一嚟到，全場氣氛好高漲，原來場內唔少傷健人士，民望高都識得㗎，佢哋仲不停問候早前跌親嘅民望高。民望高一度除低副眼鏡，俾大家檢驗傷勢（圖），證明真係冇事叫大家毋須擔心。
現場幾十圍，民望高逐圍握手，加上唔少人拉住佢影相，欲罷不能搞到下個活動都遲咗。佢致辭時叫傷健人士記住打流感針，以及天氣凍保重身體，搞到在場人士好鬼冧。眼見民望高極度投入，連陳婉嫻都笑住話認輸，仲話要重新評估呢位局長㖭呀！