呢幾日香港凍到震，可惜吖，大人唔係細路哥，噚日冇得放假，要喺5℃氣溫下縮吓縮吓返工。但有個老闆好窩心，因太凍而放員工一日假，受網民頌讚，公司名亦喺facebook被瘋狂洗版，無啦啦有免費宣傳！八方葡萄之餘都問過本身係老闆嘅鍾國斌，點睇好老闆定義，佢話係咪好老闆，都要睇番package喎。
「平時都要對員工好」
本地團購網站「Group Buyer團購家」嘅員工噚日喺fb分享喜訊，貼出老闆傳畀員工嘅停工通告，話由於天氣持續低溫，決定周一毋須上班，但若然同客戶有約會嘅，就要依舊赴約，其他員工如有需要亦可返回公司做嘢，更窩心提醒員工「着多件衫，保重身體」。此舉唔止感動員工，仲獲萬名網民激讚。「你有冇見過老闆叫員工因天氣凍休息，有呀，真係有，我見過！」當然亦有人好葡萄：「公司請人嗎？我要轉工呀。」但亦有網民「陰謀論」，話老闆「試緊邊個員工會肯為公司赴湯蹈火，嚴寒天氣都肯返工」。
八方噚日都想搵吓呢位「良心僱主」，可惜未聯絡到，而本身都係老闆嘅自由黨紡織界代表鍾國斌就話呀，突然放一日假畀員工咁窩心，自然獲員工爆like嘅，但佢個人覺得呢，唔可以只靠放唔放寒冬假，嚟定義係咪好老闆㗎喎：「好老闆都係睇package，一定平時都要對員工好好。」佢話以前香港有廠嘅時候，包埋伙食，有阿姐負責煮飯煲湯，有時煲吓糖水，寒天下都令員工暖笠笠。
總商會主席彭耀佳就話呀，受惠放假嘅員工，當然好開心，但難以因此斷言話呢個老闆就係良心僱主喎，又話其他公司可能提供更佳嘅員工福利呢，所以好難講，「凍天假」係咪值得鼓勵。
李八方
mailto:[email protected]