立法會新界東補選下月28日就係喇，呢次選舉陷於7人混戰，雖然呢兩日寒流襲港，有人依然唔敢怠慢，不過亦有人因為寒流而叫停助選活動，巧合地兩者都同長者有關。
話說公民黨「岳少」楊岳橋（Alvin）噚日原來喺寶琳站舉行造勢活動，搵咗班傘後好友撐場，不過最終因為天氣太凍同不穩，臨時取消咗個活動，八方問Alvin，唔通真係咁怕凍？佢就話非也，因為應承出席傘友唔少係老人家，要佢哋冒雨捱凍造勢真係唔忍心，所以惟有擇日再嚟。
黃成智上山搵第三條路
同樣要戶外活動拉票，民建聯參選人周浩鼎就一於少理，喺新東搞花車巡遊誓師，仲有唔少長者出席，包括年近70嘅前黨主席譚耀宗。佢自言無懼嚴寒顯決心，不過有網民喺佢facebook留言質疑「虐老」，仲有人話：「搵老人家同你捱凍……你叻！！」
本身係西貢區區議員嘅獨立參選人方國珊就出動送暖，同另一西貢區議員張美雄周日凌晨4點去深水埗探望露宿者，將自己少着嘅厚衣送畀對方，之後仲冇停過，全日新東各區擺街站，夠晒博。
新思維黃成智就自己周日凌晨搞咗個「溶冰團」，由川龍出發行上大帽山，佢話去到山腰時只得-1.2℃，捱凍上山係想顯示勇氣同承擔，為香港行出第三條路喎。不過，八方都要提大家一句，惡劣天氣下登山要量力而為，否則苦了自己，仲忙了一班消防、救護㖭呀。新東補選候選人還包括梁天琦、梁思豪及劉志成。
李八方
mailto:[email protected]
