早排做過平機會委員嘅謝偉俊Paul，喺立法會政制事務委員會一時口快快，爆咗現任平機會主席周一嶽有份參加遴選新任主席，呢單消息一見報就立即引起一班保守團體不滿，今日仲要去政總搵政制及內地事務局同特首抗議，反對畀周一嶽再做主席。
呢班團體包括性傾向條例家校關注組、護家協會、捍家盟、同埋反對同性婚姻大聯盟，睇個名已知佢哋乜嘢立場，當中有啲團體之前已經抗議過周一嶽處事不公、一面倒偏袒性小眾社群，所以一早有「牙齒印」，今次只係藉機想趕走周一嶽。不過正如謝偉俊講，𠵱家平機會仲遴選緊新主席，咁樣搵局長特首抗議，又係咪想叫政府干預平機會獨立運作呢？