呢幾日香港真係凍咗好多，內地唔少地方則已降至零度以下，早幾日去咗哈爾濱開市政協會議嘅民建聯鍾樹根，自言喺負40度下變成「凍樹根」。
Tree根喺fb貼咗佢喺哈爾濱嘅相，漫天雪地，一片白茫茫中，佢只係戴咗頸巾、著咗大褸，睇落唔覺變咗雪條，但佢向八方強調現場查實好凍，攞命嘅係室內、室外溫差有成50度，佢嘅保暖策略係：外面一件大嘅長褸，最好必須及膝，入面再著番件冷衫同綿質嘅衫，總之唔好著天蠶衣，事關室內、外溫差大，若然著天蠶衣，入到室內會好熱。
佢仲透露當地政府提醒政協委員，去到室外記得唔好亂摸啲金屬表面，唔係好易黐實咗，國家真係好「窩心」喎，可能怕凍樹根若然曳曳亂摸，好易變成凍黐根！佢噚晚特別趕返香港，原來係為咗出席立法會應付拉布戰，唔知商務及經濟發展局局長蘇錦樑點樣報答佢呢？