呢日食飯冇約人，點半鐘以後走到上海總會，一個人冇乜好食，就叫一碗陽春麵加個鱔糊，哈，又正噃，好好味道，埋單95元，同到翠華茶餐廳食碟頭飯差唔多。食完例牌在中環散步，行吓行吓，行到電車路Bossini，聽到用港式英文熱烈高呼：Happy Hour，Buy One Get One Free！咁筍？購物都有「快樂時光」，店內有不少菲裔顧客，佢地爭住問清楚，原來係下午3至7點，買T恤類可買一送一，幾有吸引力，但從股票投資講，呢間公司最近宣佈業績大倒退，現在又出招 Happy Hour Shopping，可見零售業務真係幾差吓，所有零售股應該避之則吉。
店員咁努力喊街，都要走入去睇睇有乜便宜夾大件嘅。睇到有啱左丁山晒士嘅仿絲棉紡外衣，外形似足羽絨，江蘇製造，其實就係自己讀大學時期嘅太空褸，竟然係標價120大元，平到咁，唔買都對自己唔住，點都好啦，買咗至算。
行出門口不遠，居然碰到應該人在美國嘅會計師 N，佢先發制人，問一句：「揸住個Bossini袋，你都啱嘅咩？你身上嘅羽絨有個細細牌子名，你估我唔識呀，我地美國靚嘢貴貨Patagonia……」唉吔，講到咁白做乜鬼，連忙截住佢，反問：「你係美國人，返嚟做乜？」會計N騎騎笑，一路行去恒生銀行總行一路講：「我本已做到厭，去年辭工提早退休，同老婆周圍去旅行，點知聖誕前收到一位中學死黨急call，佢話知道我退咗休好得閒，用甘詞厚幣兼俾埋間屋我住，請我返港幫佢搞公司重組兼稅務總體規劃；老友鬼鬼至講，佢話對啲年輕會計師冇乜信心，係要我呢類老鬼鎮住先至OK喎，咁咪返咗嚟囉，起碼要搞多半年至九個月。」會計N 25年前（因為六四）移民，當時已係大公司會計主任，去到美國又三扒兩撥考到美國CPA，從頭再開始，居然從未試過失業，經常俾公司挖角跳槽，究竟有乜把炮？會計N話：「唔好話我讀本港中小學時受填鴨教育，功課多籮籮，硬係算術根基打得好，讀會計科做功課做到喊，後來就有好處。好多美國會計師考試靠選擇題，埋盤數就手足無措，加減乘除都成日錯，四大會計師行之一幫我公司核數meet唔到死線，原來係資產負債表平衡唔到，俾我鬧到爆。返嚟香港以為水準高啲，唉，或者我唔好運，同學手下嘅會計師居然係要我教，唔怪得我呢個老嘢會計仲係咁吃香，美國舊老闆成日問我環遊咗世界未，可以復出未呀！」真巴閉。左丁山在中學時已考LCC Higher，後來覺得讀會計好悶，又多功課，大學改讀經濟，如果移民美國就乞米咯。