農曆新年將至，巿民忙於選購賀年食品。年年用老外的藍罐、瑞士蓮等送禮有點悶，近年本土意識抬頭，有香港製造的朱古力達人將賀年桔仔結合朱古力，推出夠地道咸柑桔、薑醋味的朱古力桔仔樹；有港產曲奇品牌則推出全港首個揮春、臘腸及瓜子曲奇餅搶客。港人撐本土貨，冀淡巿中殺出血路。
記者：蔡朗清
朱古力達人Jeffery去年9月自創朱古力品牌Patisserie Jeffery Koo，踏入首個農曆新年決定推出本土特色的農曆朱古力禮品，「香港人創意唔輸比外國人，講到農曆新年，桔仔最有本地特色，但過咗新年後，唔少人成盆桔仔丟出街，浪費又唔環保；可以就做一盆可成盆都食得落肚桔仔樹。」
Jeffery表示，經多番研究，桔仔選了咸柑桔及薑醋兩款味道，夠地道；因全人手製作，做一盆像真度極高朱古力桔仔樹，工序繁複，所需時間較一般朱古力多數倍時間，「啲桔仔夠立體，朱古力表面要噴到4層可可油，一盆45粒，要逐粒粘，又要加糖葉，又要做朱古力花盆，一日最多做到10盆。」
他續稱，整盆桔高19厘米，方便送禮自用，「一家人食完團年飯，一齊分享桔仔樹甜品，逐粒逐粒食，最後食埋朱古力花盆，夠溫馨，又環保。」另一款利是朱古力鳥結糖，則將鳥結糖人以手壓扁，中層是曲奇薄脆，外層是朱古力，再放入利是封，「小朋友收到一定好開心。」雜錦軟心賀年朱古力讓客人一次過品嚐5個產地黑朱古力。
Jeffery又指，農曆年間正好是情人節，已率先推出盒裝情書朱古力，內有4款代表激情(熱情果芒果味)、浪漫(紅莓玫瑰味)、失落(黑加侖子味)及喜慶(薑醋)，「香港朱古力作品唔輸比外國，希望港人撐港貨。」
本地曲奇品牌Yolanda Bakery則推出全港獨有的揮春曲奇餅應節，創辦人Yolanda指，港人新年傳統貼揮春，創作分別10種味道的「十全十味」及6種味道「六六無窮」罐裝揮春曲奇，罐內面層放了一對用牛油曲奇做的揮春，寫上傳統有「恭喜發財、家肥屋潤」，較潮的有「齊齊升呢、日薪過萬等」，另有一件福字曲奇，「揮春係手造手寫，好花時間做；客人打開罐曲奇，見到對揮春，一定好驚喜。」
她續稱，曲奇餅味道更有兩款充滿「香港味」的全新口味，包括臘腸及瓜子味曲奇，「臘腸同瓜子都係好地道賀年食物，所以用嚟做曲奇。我哋揀臘腸都揀到好多間，最終揀咗榮華，較軟身夾到曲奇。」她表示，客人本月30日至2月6日期間在九龍灣MegaBox分店購買，可以即場自選揮春造型，以及自行提字，中間的福字曲奇，客人更即場拍自己的照片，印在曲奇上，「特別係新年送盒曲奇畀老人家，打開見到曲奇餅係孫仔着相，同埋孫仔寫既揮春，一定會好感動。」