鞋王Le Saunda老闆李子彬，交給練馬師高伯新打理(後來轉去告達理)的貴價自購馬「看今朝」，來港半季未跑過便退役，李子彬難免失望，高伯新除了喪失此駒外，李子彬一系「直震撼」、「誰可拼」同「罕曾見」亦同時間拉離高廐，上季打吡亞軍「直震撼」加盟賀賢，而「誰可拼」同「罕曾見」雙雙轉投方嘉柏，李子彬一連串行動，可謂震撼馬圈。
其實除咗上述幾駒，高伯新另一主要支持者，康泰旅行社創辦人黃士心家族，近日亦有「旅遊首席」同「旅遊大使」離隊他投，馬房實力難免受影響。不過高伯新其實仍有機會令黃士心展歡顏，皆因呢班馬主嘅「旅遊仁義」同「旅遊大哥」將於今期(24日)代表高伯新馬房出戰，真係可以話不容有失。
其中「旅遊仁義」應係機會較高一駒，今季3戰取得2冠1殿，正處大熟大勇之境，上季呢匹馬韁口麻麻，成日閃出閃入，其中一場就因為嚴重內閃，雖然跑贏綠魔「有得威」，但研訊後卻被「有得威」告甩，冇咗場頭馬。今次配史卓豐出賽，佢話「旅遊仁義」最近試閘同快跳，都冇出現閃出閃入毛病，越來越成熟。
既然「有得威」有條件喺經典一哩賽爭勝，史卓豐有信心曾跑贏「有得威」嘅「旅遊仁義」，喺二班負輕磅亦力足建功，希望贏馬幫高廐振奮一下士氣喎！