識欣賞對手係大個仔
有啲嘢公開場合真係做唔出，例如球場對戰對手入靚波，你係死都唔讚得嘅，因為係冇面嘅，係長他人志氣嘅，但響屋企打機俾對手整球靚波，一秒灰暗之後可以試吓欣賞對手，有乜好得過一路打一路學，識得咁諗個人已經高咗一級，再唔係一個失敗者咁簡單，係一個有品嘅失敗者。
有啲嘢發洩係好啲嘅
難免嘅，遇到挫折心傷難免，為免做出YouTube常見嘅打爆電視或將部PS4掉落街嘅儍事，專家建議大家應該有適當嘅出氣位，有啲人鍾意爆兩句粗，甚至係對住個mic講畀online對手聽，但呢種空氣污染係於事無補嘅，健康建議方法有幾種：輸一球即做五吓push up，輸第二球倒立五秒，輸第三球原地喪跑10秒，一來可以避開唔睇對手令人眼冤嘅慶祝畫面，二來萬一大敗，你都可以安慰自己運動有益身心。
有風格可以掩飾唔及格
輸波唔係最侮辱嘅事，輸畀用同一隊波用同一班球員嘅對手先係最大侮辱，因為你冇得賴呢樣嗰樣，純粹輸技術，所以用人最好唔好人用你用，反而用啲雞隊怪人，唔睇得都賴得，情形有如fashion嘅嘢，你可以話我着得怪，但起碼唔會撞衫。
人人係妄想被害病患者
遊戲世界有冇黑哨？有，你輸12碼嘅時候！咁你博到12碼嘅時候呢？都係黑哨，因為冇趕對手出場。
最大敵人其實係自己
同業餘打網球一樣，玩𠵱家越來越難控制嘅《FIFA》，其實有超過一半嘅失波，係你送畀人嘅，不過唔使擔心，一半玩家都唔會留意到係自己問題，另一半呢，都學識咗原諒自己，自己嘅錯唔係錯，只係不幸。
生活實在太過多姿彩
唔打機你可能唔知，你嘅生活實在太多嘢玩，打機期間要睇電視要「碌飛卜」要覆WhatsApp仲要傾偈甚至要食飯，都市人咁忙而《FIFA》竟然要我哋打機嗰陣好專心，妄想。
尾彩係最佳嘅安眠藥
臨瞓係打機嘅最佳時間，又或者準確啲講，打機打到攰先瞓係正常，但無論日子有幾難過，對手有幾難纏，我哋卑微嘅機友都有個堅持，就係唔可以輸波去瞓，係會瞓唔着嘅，就算係輸家都一定要食尾糊，咁先瞓得甜，第二朝先會充滿朝氣。所以當你發現你個老公男友或囝囝打機唔瞓，唔好話佢，佢都唔想嘅！
KEYMAN
節目主持