周日(24日)第五場四班1400米，鄭俊偉馬房的「四小福」一連兩仗喺同程配雷神全勝，前仗排最差的14檔，依然擊敗「摯跑得」掄元，而上場孭130磅好重吓，但都熱到兩倍不夠，最終亦順利掄元，證明此駒進步且勇。但今仗「四小福」回升第四班，雷神揀同場「甜城效應」而棄騎「四小福」，是否認為「四小福」唔夠班呢？
其實大家真係唔使太介意，因為雷神最近成日揀錯馬，「騰煌」、「東方快車」、「飛廉之子」都係雷神唔騎而照贏，結果三駒都因此有更佳賠率，「騰煌」冷到17倍，所以「四小福」今次用史卓豐，其實更加抵玩。
「四小福」其中一位馬主廖齡儀說：「『四小福』上次贏五班孭重磅，都跑到1分23秒返來，今次上四班孭輕磅，狀態都仲有嘅，但要睇睇騎師發揮啦，希望可以報捷啦！」
廖齡儀養過兩匹團體馬「神勇馬車」和「鴻圖戰士」，其中已退役之「神勇馬車」3捷，現役之「鴻圖戰士」就贏過兩場，連埋「四小福」亦兩捷，合共7場頭馬，可見廖齡儀係有運馬主，所以「四小福」今次真係唔好睇小。