「真‧寒流」殺到，球迷做好準備！本地波周末一連三日有比賽，南華噚晚打頭陣喺旺角場寒風下以3:1贏夢想駿其出線菁英盃；今午同場續演灝天黃大仙對香港飛馬嘅另一場分組賽。至於聽日戲肉銀牌決賽，冠忠南區對東方喺大球場廝殺，賽前講到有機會落雪咁誇，捧場客記得着多件衫嘞。
銀牌作為今季首項本地頂級聯賽錦標，足總當然要隆重其事，噚日邀請東方同南區兩隊職球員上演牙骱戰，東方總監梁守志話，自己平時好少出席呢類記招，因為對手派嘅代表級數唔同，今次南區有主席陳文俊上嚟，自己都要畀吓面。講到對手，梁守志就話南區教練鄭兆聰都係佢專程由哥斯達黎加以三萬美金買返嚟，加上南區有唔少球員踢過東方，算得上係東方B隊，決賽又點樣贏到A隊呢。
牛丸聰仔冰釋前嫌
兩年幾前擔任傑志助教時同當時飛馬助教陳婉婷發生衝突嘅鄭兆聰，就向東方大派高帽：「東方實力及班費都優勝過南區，每名球員都獨當一面，決賽發揮到嘅話有機會賽和，再靠12碼爭勝。」對於賽事喺寒冷天氣下進行，鄭兆聰話除咗熱身要做好啲，更衣室亦準備熱飲，等球員賽前暖暖身喎。
南華「寒戰」3:1挫駿其
其實兩年前已經同聰仔冰釋前嫌嘅東方教練陳婉婷（牛丸），噚日被問到鄭兆聰「胸」撞一事以行動證明，喺記者會又握手又搭膊頭影相，不知幾老友咁款，牛丸亦提醒球員要着夠衫，病咗影響表現就大件事喇。隊長葉鴻輝講明自己怕凍，比賽當日會着多件衫，恐防凍親。力爭球會第10個錦標嘅東方，有聶凌峰、美路史拿域同鄭少偉受傷，暫時得18人可供調動，兵源算緊張。
至於南華噚日喺旺角場踢菁英盃，唔知係咪同天氣凍有關，得444人入場，結果佢哋以3:1贏夢想駿其，喺B組出咗線啦。南華FB之後仲公佈賀歲盃參賽名單，但得陳偉豪、張志勇、陳肇鈞、車潤秋、林學曦、摩拉、羅素出戰，門將曾文輝同梁興傑就二揀一。
