噚日係香港總商會總部擴充後開張嘅大喜日子，總商會主席彭耀佳、常務副主席吳天海、行政立法兩會議員林健鋒趁住喜慶日齊齊變身超級聯繫人，同畀面出席主禮嘅財爺曾俊華「連繫」起來。
彭耀佳話，擴充係要更好地服務會員，財爺就向總商會送高帽，話總商會一直同政府合作，同聲同氣，但都有和而不同嘅時候，咁就正好反映大家彼此係朋友關係。
八方聽聞，喺呢個喜慶大日子，總商會都唔想只係剪綵咁老套，所以食住近日一帶一路熱潮，由總商會3位重量級代表擔任聯繫人角色，並請來財爺粉墨登場，四位將印有香港總商會標誌嘅USB連接起嚟，寓意總商會能連繫各界、接觸全球，將商家、企業家、政府和同世界各地商業連結，發揮互利共贏作用。