有金牙大狀之稱嘅清洪噚日着晒大狀袍同假髮喺高院出現，但佢唔係嚟打官司，原來係佢做大律師嘅契仔清晞誦（原名周英傑）申請轉職事務律師，佢出席契仔嘅正式委任儀式。讀藥劑出身、後來讀法律嘅Bernardo曾經係歌手，2005年成為大律師。
讀者可能會奇怪，做大律師有乜唔好，點解無端端要轉做律師？查實因為做大律師有太多規則要遵守，唔似做律師自由度咁大，可以用自己名義做生意，40歲嘅Bernardo想喺商界大展拳腳，諗咗好耐決定放棄做大狀，契爺同師父梁照林大律師都支持。佢𠵱家除咗做出入口生意，仲喺中環開咗間晚裝店，嚟緊仲會進軍餐飲業，喺蘭桂坊開酒吧㖭！