雪景好多人都見過啦，冇乜特別啫。不過如果喺香港見到就唔係咁講喇！ 早排美國國家氣象局嘅GFS電腦運算預報，曾指香港星期日可能落雪！嘩！真係㗎！？咁唔知你哋想唔想喺香港睇到雪景呢？期唔期待白色冬季？如果真係落雪最想做咩？我哋就去到銅鑼灣，突擊訪問下大家有咩idea先。
現實派阿彥：「唔信，就算真係落雪都係要返工㗎啦。」
浪漫型顏小姐：「有聽過（會落雪）1cm厚嘅雪，我諗喺山上面可能會落，想親身去山上面睇下。」
童心未泯嘅Daniel：「最好地面有雪，舖滿地就最好。會影相，喺香港嘅雪景好罕見。」
低調嘅唐小姐：「唔信。但如果真係落希睇下雪景就ok，因為應該唔會可以落到夠拋雪球。」
為食型Derrick：「天氣咁凍，落雪我都唔想出街，會打邊爐。」
姊妹淘林小姐：「我希望積雪，起碼有啲嘢睇，會影相然後放上網。」
姊妹淘陳小姐 ：「我想砌雪人。」
瀟灑型蕭先生：「香港落雪機會應該好微，如果真係落就期望愈大愈好。」
穩陣型米奇：「都唔係好信會落雪，真係落就出去行下，試下係點，但又唔使落太大雪，細細哋就ok。」
其實香港分別喺1893年、1967年同1975年都有試過落雪，所以今次美國國家氣象局預報香港可能落雪，唔係冇可能㗎！