猴年嘅香港可謂選舉年，除咗2月立法會新東補選、新一屆立法會亦喺9月改選，人大代表以及選舉委員會亦喺年底換屆，但最受市民關注嘅梗係2017年特首選舉，雖然明年先由小圈子選出，但有心入閘者今年就開跑㗎嘞。特首梁振英猴年會唔會有吉星高照，帶挈繼續跑出？八方請嚟堪輿大師蔡伯勵分析丙申猴年12生肖運程，發現肖馬嘅人新一年運氣麻麻咋，唔知CY有冇催運大法？
屬虎最霉 雞形勢大好
蔡伯勵分析丙申流年嘅12生肖運程時話呀，生肖屬虎運程最差，因有凶星歲破，屬犯破之年，凡事謹慎；馬及狗則未有吉星，來年運氣麻麻；鼠、牛、龍、蛇、雞則運程最佳。八方當然對號入座一下，新民黨主席葉劉淑儀咪屬虎囉，踏入犯破之年，唔知有冇影響佢選特首嘅意向？
至於屬馬嘅人則未有吉星，只有凶星吊客，要自求多福，妨有外服，蔡老強調「都冇乜大礙，可能係遠房親戚有啲事」。咁1954年出世屬馬嘅CY，會唔會向中央祈福？本來都係特首熱選嘅政務司司長林鄭月娥屬雞㗎，蔡老話屬雞者有吉星太陽高照，晦氣全消，即係形勢大好，但係林鄭再三表明唔選特首囉。
至於其他生肖就運程平常，包括一直被視為特首黑馬嘅財政司司長曾俊華。蔡老話屬兔者有凶星天厄只是小疵，有吉星紫微化解；而前特首曾蔭權屬猴，雖犯太歲，幸有文昌吉星，過剛則折，和氣生財。屬龍嘅首富李嘉誠相信運程唔錯，皆因肖龍者有吉星三合，陣容鼎盛。蔡老強調，個個人都唔同，以12生肖運程分析比較籠統，只可作參考。
李八方
mailto:[email protected]
