呀吓~~我要飛往天上，八方其實都好羨慕公民黨嘅飛機師譚文豪可以翱翔天際，做得機師一定讀書唔差啦，但現年40歲嘅Jeremy自爆細個其實好曳，唔多愛讀書，罰企當食生菜。
佢笑笑口話小學時經常因為口多多、傾偈同瞓覺俾老師罰企，「有時一企企幾堂，選舉時企成日又點會難倒？」佢最深刻一次係喺早會被罰企喺乒乓枱示眾，「可能因此訓練到唔怕面對群眾」；雖然當時比較矮、班內排隊企好前，但俾班主任安排坐喺角落位，「費事我被罰企阻住同學睇黑板喎」。
佢喺班上成績屬中上游，初中讀書則打天才波。到1990年因為六四原因，家人送咗當時應升讀中三嘅佢去澳洲讀書，喺小鎮冇乜嘢做，令Jeremy玩好多球類運動，「悶就讀吓書，咁先開始對讀書有興趣」。
佢曾經係北昆士蘭省學界排球代表；而住宿舍期間同五湖四海同學接觸，令佢大開眼界，好記得曾經問一個新幾內亞同學當地係咪有食人族？對方真係話有，嚇到佢吖，好在對方補充山上至有咋！
