一年前的時候美元係咁升，筆者身邊有唔少朋友都話過，等到歐元兌美元跌到落一算就會去一趟歐洲之旅，好可惜歐元去年3月的時候，落到1.0458就反彈番。
歐洲之旅一世遙遠
好多人都預期美國加息之後美元就會大升，同時，由於港元同美元掛鈎，喺美元走強之下，未來外遊可能會更加抵。不過筆者就覺得，美元未必會再有大升空間。
話說匯豐早排唱淡美元，理據係美元匯率已經反映咗美國加息，然而，歐央行同日本央行亦已到咗量寬嘅極限，意味住美國同其他主要國家幣策之間嘅差異，唔會再進一步拉闊。
債市所反映嘅加息預期，往往較股市、經濟師，甚至係美國儲局官員本身嘅睇法，來得更為準確。
芝加哥商品交易所嘅利率期貨市場反映，美國利率喺2016年12月份，有大約三成機會維持喺家陣嘅0.5厘不變，至於加息一次至到0.75厘嘅機會就有四成左右。換言之，美國今年加息一次或以下嘅可能性會有七成。
如果上述預期準確，美國咁緩慢嘅加息步伐理應難以推動美匯再大升。不過筆者唔認為美元已經見頂，更加唔敢講美元會轉跌，反而傾向覺得美匯會喺現水平上落。畢竟美國經濟尚算OK，未有迹象顯示呢輪加息周期即將結束，所以美元喺現水平仍然有基本因素作支持。
另外，由於美元可能會繼續橫行，大家都係唔好對歐元同日圓匯價進一步走弱抱咁大的期望，如果真係要等到歐元兌美元一算先嚟歐遊的話，相信歐洲之旅只會一早比一世遙遠。
El.
本欄逢周二、五刊出