中超球隊廣州恒大喺上季勇奪亞冠盃冠軍，喺決賽為恒大奠勝嘅巴西前鋒艾傑臣，即將同球會講拜拜。另一間中超球會上海上港喺周四宣佈，已經同恒大達成收購艾傑臣嘅協議，後者近日會到上海，過埋體測就會正式加盟。恒大喺2012年用570萬歐元（約4,900萬港元）收購艾傑臣，今次賣佢收番1,850萬歐元轉會費，仲加埋喺來季中超唔可以倒戈上陣嘅條款，都咪話唔划算。艾傑臣過檔上海，將會同另一位前恒大主力孔卡做番隊友。