皇家馬德里自從由施丹接替被炒嘅賓尼迪斯之後，成班球員一下子好似團結晒咁，喺周三仲搞聚餐賀吓施丹開局成績咁好，超過20個一隊成員全部到齊。同日較早之前，全隊上下亦一齊影新團隊相，相比起季初同賓尼迪斯影嗰陣個個黑面神咁，今次全部球員開心晒，基斯坦奴朗拿度（C朗）仲識整蠱下排前面嘅沙治奧拉莫斯（圖）。另外，日前網上有份聲稱係皇馬同加里夫巴利嘅合約內容披露，指巴利嘅轉會費真係要一億歐元，確定係貴過C朗。